_متخافيش عليا انا كبرت واقدر اعتمد على نفسي، ورجعت لصاحبي، وعرفته المبلغ اللي معايا، قالي إحنا لازم نسهر في مكان كويس، وخرجنا، وكل يوم سهر، وخمره وبنات، ومعدش فارق معايا، غير الفلوس اللي ماما بتبعتهالي، بقت سيرتي على كل لسان، وصوري مع البنات في كل حتة، وفي أماكن مشبوه مليه الفيس والنت، وخصوصا إن والدي له إسمه ومكانته في المجتمع، ومعتش بسمع كلام حد ولا يقدر اي حد يقف قدامي، وفي يوم كنت سهران في مكان مشبوه، وشوفت منظر،
مكنتش اتخيل أبدا انه يحصل، شوفت ماما وأختي داخلين المكان، وكل الرجاله السكرانين، بيحاولوا، يلمسوهم، وأختي بتصرخ من الر.عب وشوفت في عين ماما خوف وحسرة على الاماكن اللي بختار اكون فيها، جريت زي المجنون عليهم ض.ربت اي حد بيحاول يلمسهم واخدتهم وخرجت، ولما خرجنا قولتلهم بغضب: _انتوا ايه ايه اللي جابكم مكان زي ده.. ردت عليا ماما، يقهره وكسره نفس، وقالتلي: _ جيت ادور عليك، واقولك، أن بابا تعبان قوي وعاوزك ترجع معنا سمعت منها الكلام، ومكنتش عارف ارد عليهم، فقولتلها بانكسار:
_عاوزني ارجع البيت، بعد ايه أنا خلاص، ضعت.. مفيش حاجه وحشه معملتهاش وكل ده، بسببكم سبتوني في الشارع ومحدش اهتم بيا ولا فكر انه يعالجني.. ردت عليا وقالتلي بحزن: _ان شاء الله، هتتعالج، وهتبقى كويس بس ارجع معنا، فعلا رجعت معاهم، وبابا اول شافني انهار من العياط، وقالي: _، ليه عملت في نفسك كده دمرتنا ودمرت نفسك يا ابني… بكيت في ح.ضنه وانا بقوله: _غصب عني الشطان غواني وابتلاني بصحبة السوء اللي جابوني الارض.. طبطب عليا وقالي:
_انا هعالجك في أحسن مكان.. واخدني وحجزلي في مستشفى لعلاج الادمان،والحمدلله بعد معركة طالت لسنة ونص انتصرت و اتعالجت من المخدرات، و بابا قرر إني لازم اتجوز، عشان انسى المرحلة الصعبة اللي عشتها دي فقولتله: _خلاص انا هشوف عروسه تناسبني رد عليا بعصبية وقالي: _ انت عاوز تجبلنا بنت من الشارع والأشكال اللي كنت بتمشي معاهم، وقبل ما اتكلم، ردت ماما وقالت: _ بابا عنده حق، هو هيعرف يختارلك صح.. قولتله بيأس: _ خلاص معنديش مانع..
ومفيش كام يوم ولقيت والدي بيقولي: _لقيتلك عروسة بنت ناس وهنروح، نشوفها بكره، وفعلاً روحنا وقعدت معها، وارتاحتلها جدا وتمت الخطبه، بس والدي قالي الفرح في أقل من شهر، فرحت خصوصا إن العروسه جميله قوي، بس والدتي نبهت عليا ان مفيش حد من اصحابي القدام يحضر الفرح، قولتلها: _ اصحابي كلهم مش وحشين، لا أنا عندي أصدقاء، اولاد ناس وملهمش في الشمال.. سكتت وسبتني اعزم اللي انا حاببهم، بس يوم الفرح حصل، حاجه غريبه جدا،
اصحابي، جم يبارلكولي، وكان معاهم صاحبي اللي مشاني في الغلط، مع إني معزمتوش واول ما شافني، قالي بسخريه: _ أنت صحيح معزمتنيش واستعريت مني، بس انا جاي تبع العروسه، طبعا مركزتش في كلامه لإنه مش في وعيه بس وهو خارج قالي، رقمي زي ما هو ولو احتجت اي معلومه عن العروسه كلمني، وضحك بسخريه وخرج، كملت الفرح عادي، ولما رجعنا البيت لقيت حنان خايفة ومرعوبة مني وبتقولي بصراخ: _ اوعى تقرب مني،انت فاهم.. استغربت من حالتها الغريبة دي ، قولتلها:
_طب اهدي بس.. ردت عليا وقالتلي بدموع: _ انا اتجبرت اوافق على الجوازة دي انا بحب واحد تاني ولو حصل إيه مش هكون لغيره اتصدمت من كلامها، وحسيت ان ده عقاب من ربنا عن البنات اللي ضحكت عليهم، ووعدتهم بالجواز، كام واحده قولتلها بحبك وانا بتسلي بيها، كام واحدة كسرت بقلبها، بالوقت ده حاجات كتيرة هاجمتني ومنهم كلام صاحبي الشمال، ولقتني برن عليه من غير ما أحس، وقولتله: _انت تعرف ايه عن حنان؟ قالي بسخرية:
_كنت َمستني اتصالك من ساعتها، وسمعت منه الكلام اللي دمر حياتي كلها، قالي ياصاحبي، حنان دي حب عمري، وأبوها رافض جوازنا، طبعا أنت عارف الأسباب، واخر حل وصلتله، إنها تتجوز غيري بس تبقى ليا، ياريت تكون فهمت، ولما عرفت ان انت العريس، قولت اعرفك، الحقيقه، والباقي عليك بقى،
حسيت باللحظة دي اني اتجمدت، مكنتش عارف اخد اي قرار، لاني حبيتها بس زي ما كسرت قلوب بنات كتير جيه الوقت اللي ينكسر قلبي وادوق من نفس الكأس، طلقتها لما صممت على الطلاق وعشت حياتي كلها بكفر عن ذنوبي اللي ملهاش عد، وادعي ربنا انه يسامحني ويعوضني خير….. والعوض ده مش لازم يكون في جواز، لانه عوضني بالاحسن منه وهي الهداية والطريق المستقيم اللي نور حياتي اللي كانت مليانة بالمعاصي…. اية محمد رفعت…
