ردت باعتذار وخجل شديد وقالت انا معنديش علم خالص ان بنت عمها كانت معاها قبل كده، علاء طلب مني اجي اطلب ايد صفاء وانا قولتله ياجلها عم اسافر البلد لان والدتي كانت بعافيه شويه وام رجعت جيت طلبت ايديها . حسيت ان قلبي بيرقص من الفرحه يمكن مفكرتش في الخجل اللي عاشته اميره وان الوضع محرج . ردت تيتا وقالت عادي يام علاء ولا يهمك هما الاتنين واحد واخوات . بس بعد اذنك تقدري تستاذني الوقتي عما احل سوء التفاهم اللي حصل وافهم البنات الوضع الجديد .
وفعلا استاذنوا في وسط جو ملان بالاحراج . وبعد شهرين جي علاء اتقدملي واتخطبنا . كانت الخطوبه سنه . وكانت اسعد سنه في حياتي وكل حاجه بينا كنت بحكيها لاميره . اتجوزنا وبعد ست شهور حملت ربنا كرمني بتوام . سيف وعدي . ساعتها اميره هدتني خاتم من الدهب وكان فيه نقوش وفصوص من الالماس . رفضت اني اقبل الهديه دي وقولتلها انها غاليه اوي . لكنها صممت وقالت وانا ههديه لمين اغلي منك يعني بس عندي طلب اوعي تشليه من ايدك وكملت بضحك علشان تفتكريني دايما اوعديني .
رديت عليها باستغراب وقولتلها ليه بتقولي كده ؟ ردت وقالت اكيد انا هتجوز وهتلبخ ومشاغل الحياه كتيرة فمش عايزاكي تنسيني اوعديني . فعلا وعدتها وكنت صدقه في الوعد خصوصا انها اتجوزت وسافرت مع جوزها وبعد ماكنا مع بعض اربعه وعشرين ساعه بقا الاتصال بينا عباره عن مكالمه صوتيه مش بتكمل ربع ساعه كل شهر او شهرين مره . ومن بعد اليوم ده وانا حالي اتغير وكل يوم يسوء عن اللي قبله . كنت كل مااتكلم مع حد واشتكيله كانوا يقولولي عادي اكتئاب بيجي بعد الولاده وفتره وهتعدي وهترجعي لحياتك الطبيعيه ويمكن احسن .
والدتي مفرقتنيش طول الفتره دي وبقت هي اللي شايله بيتي والولاد كمان ولقيت نفسي ببعد عن جوزي وعيالي وقفله باب اوضتي عليا سنه ورا سنه ضاع عمري ورا باب اوضتي . كنت يدوب بخرج من الاوضه اطبخ واحط الاكل لعلاء ولولادي وادخل اوضتي تاني اقفل ع نفسي وانا بحاول اقاوم الحالة النفسية الغريبة دي، مع اني روحت كتير لدكاتره نفسيه وللاسف مطلعتش بنتيجه . لحد مافي يوم علاء اتخانق معايا خناقه كبيره وقالي كلام ضايقني جدا .
رنيت علي والدتي لاول مره بعد اكتر من سنه كنت فيهم معزوله لوحدي ولقيت نفسي بخرج كبت كبير جوايا من كلام علاء ليا وقولتلها بحرقه بيقولي اني معتش ليا لزمة في بيته انا ماليش اي لازمه في حياه حد لا في حياته ولا في حياه ولادي حتي . ردت عليا بشفقه علي حالي وقالت طيب يابنتي مش هقولك روحي لدكتور تاني بس فيه دورس دنينيه في الجامع حاولي تروحي وتواضبي جايز يتغير حاجه او حتي نفسيتك تتغير .
وبدون تفكير لقتني بلبس وبخرج وفعلا روحت وارتحت جدا للست اللي بتحفظ قران وحبيت الموضوع وبقيت بحس براحه نفسيه طول فترة الدرس، وفي يوم كان موضوع الدرس عن التبرعات والصدقه ولقيت كل اللي كانوا موجودين وهما خارجين كانوا بيسيبوا حاجات صدقة لله .كلهم سابوا فلوس الا انا بصيت ملقتش معايا غير الخاتم اللي كان ذكري من اميره وبقالي سنين لابساه ومقلعتوش، قلعته وجيت اعطيه للشيخه رفضت وقالت: _لا ياحبيتي ده شكله قيم جدا وغالي عليكي بدليل انك من يوم ماجيتي وانضمتي معانا من اربع شهور مش قلعتيه ولا شوفناكي مره من غيره .
